8. October 2018

Ilinniagaqarsimasunut skibsassistenimut pikkorissarneq

Ilinniagaqarsimasunut skibsassistenimut pikkorissarneq

Saviminilerinermik ilinniarsimasutut allagartaqaruit ilinniagaqarsimasunut skibsassistentimut pikkorissarnissamik qinnuteqarsinnaavutit. Ilinniarnerit naammasseriarlugu ukiumi ataatsimi skibsassistentitut misilittagaqanngitsutut umiartoreeruit skibsassistentitut misilittagalittut allagartartaarsinnaavutit.

 

Qinnuteqarfissaq: Ukioq kaajallallugu

Sivisussuseq:Sapaatit-akunnerinik qulinik sivisussuseqarpoq. Ilinniartitaaneq Paamiuni

Suliassat:

Skibsassistentip umiarsuup qaavani maskiinaqarfimmilu suliassat tamaasa suliarisarpai. Skibsassistentitut aquttarfimmi maskiinaqarfimmilu pigaartut, aquttut, usilersornissamut piareersaasut usilersuisullu ikiortassavatit. Aamma kranilerinermi, pituttuinermi umiarsuup maskiinaanik pingaarnermik tapertaasunillu atortorissaarutinillu allanik aserfallatsaaliuinerni ikiuuttassaatit. Eqqiaaqataallutillu aserfallatsaaliueqataasassaatit isumannaallisaanermilu, soorlu røgdykkeritut, peqataasarlutit.

Piumasaqaatit:

Ukunani ilinniarsimasut pikkorissaqataasinnaapput:

  • Industriteknikeritut
  • Sakkuliortutut
  • Umiatsialiortutut
  • Saffiuutut
  • Biililerisutut aamma autoelektro-lerisutut
  • Lastbiililerisutut
  • Entreprenøritut aamma nunalerinermi maskiinalerisutut
  • Finmekanikeritut
  • Skibsmontøritut
  • Beslagsmedetut
  • Karosserismedetut
  • Kølemontøritut
  • Bådebyggeritut/skibstømmeritut
  • VVS-montøritut
  • Procesoperatøritut

Peqqissutsimut uppernarsaat atuuttoq

Illinnialertussatut tigusaassaguit atuuttumik peqqissutsimut uppernarsaat killiliisuunngitsoq nasissinnaasutut naliliisoq pigisariaqarpat. Qalipaatinut tappiitsuussanngilatit.

Ilinniaqqinnissamut periarfissat:

Skibsassistentitut misilittagalittut ilinniaqqinnissamut periarfissarpassuaqarpoq, pikkorsarnerit sivikinnerusut ilinniarnerilu sivisunerusut.

Amerlasuut “Inuussutissarsiutigalugu angallassinermut pikkorissarneq” aamma radiomik pikkorissarneq “ROC”, sapaatit-akunnerinik sisamanik sivisussusillit, ingerlaqqissutigisarpaat. Taakku pikkorissarfigisimagaanni skibsassistenitullu misilittagaqartuugaanni umiarsuit 200 bruttotonit tikillugit aquttuuffiusinnaapput.

Aamma sumiissusersiornermik ilinniarfimmi ilinniartoqarsinnaavoq kystskipperitullu, sætteskipperitut umiarsuulluunniit naalagaatut ilinniarluni.

Teknikkimut tunngasortaa soqutiginerugaanni umiarsuarmi maskinistinngorniarfimmi ukioq ataaseq ilinniartoqarsinnaavoq. Umiarsuarni 3000kW tikillugit maskinmesteritut umiartorsinnaalerluni.